10 сентября 2015 - Веб-редактор
Келер жылы Қазақстанда тиімді дәрі-дәрмектер бағасы қолжетімді болады. Бұл жөнінде ҚР Денсаулық сақтау және әлеуметтік даму министрілігі мәлімдеді.
Отандастарымыз бұл игілікке 2016 жылдың бірінші қаңтарында қол жеткізбек. Еуразиялық экономикалық одақ аясында дәрі-дәрмек пен медициналық бұйымдардың ортақ нарығы өз жұмысын бастаған сәттен қазақстандықтар препаратттарды арзан бағамен ала алады. Сала министрлігінің хабарламасына сүйенсек, Еуразиялық экономикалық одақ елдері аумағында тек GMP стандарттарына сай келетін медициналық препараттар таратылады. Бұл Одаққа мүше мемлекеттер арасында бәсекелестікті арттырып, Қазақстанға тиімді дәрі-дәрмектің төмен бағада келуіне септеседі деген сөз.
Ведомство хабарламасында жазылғандай, дәрілік заттар мен медициналық өнімдер Еуразиялық экономикалық одақ аумағында Еуропалық одақ қағидалары мен тәсілдері негізінде жасалған бірыңғай ережелердің тіркеу тәртіптерінен өткеннен кейін ғана еркін айналымға жіберіледі. Дәрілік және медициналық заттарды таңбалауда мемлекеттік тілді қолдану талаптары сақталады. Оның бәрі айналымды қадағалау, мемлекеттік бақылау жұмыстары барысында жүзеге асырылады.
Қазақстанда дәрілік заттардың, медициналық бұйымдар мен медициналық техниканың қауіпсіздігін, тиімділігі мен сапасын қамтамасыз етудің негізгі міндеттері жүктелген мекеме бар. Ол – ҚР Денсаулық сақтау және әлеуметтік даму министрлігінің дәрілік заттар, медициналық мақсаттағы бұйымдарды және медициналық техниканы ұлттық сараптау орталығы.
Биыл аталмыш орталық Еуропа кеңесінің дәрілік заттардың сапасын бақылау директоратында аккредитациядан өтпек. Бұл ұйымға мүше болу арқылы біздегі сараптау орталығы өз беделін көтереді, жасалған сынақтарының нәтижесі халықаралық деңгейде мойындалады. Сондай-ақ дәрілік заттарды сынақтан өткізу мәселелері жөнінен Еуропа елдерімен тәжірибе алмасады.
«Дәрілік заттар мен медициналық мақсаттағы бұйымдардың және медициналық техниканың айналымын өзара инспекциялауды мойындау мақсатында ЕЭО-ның барлық елдері PIC/S құрамына кіруі керек. PIC/S – фармацевтикалық инспекция бойынша конвенция мен фармацевтикалық инспекциялар ынтымақтастық жүйесі – GMP саласындағы өзара белсенді және құрылымдық ынтымақтастықты қамтамасыз ететін елдердің фармацевтикалық секторларын реттеуші органдар арасындағы екі халықаралық келісім болып табылады. Қазақстан мен Беларусь PIC/S құрамына ену үшін өтініш білдірді», – делінген министрліктің хабарламасында.
ЕЭО елдері дәрілік заттар мен медициналық мақсаттағы бұйымдардың бірыңғай қағидалары мен тәртіптері туралы келісімге 2014 жылдың 23 желтоқсанында қол қойған болатын. GMP (Good Manufacturing Practice, аудармасы – Тиісті Өндірістік Тәжірибе) стандарты дегеніміз – дәрілік заттардың сапасын, қауіпсіздігі мен тиімділігін растайтын стандарт.
Есен САБЫР,
primeminister.kz
ақпары бойынша
